SHQIPËRIA E BASHKUAR, SI E DREJTË E PAKONTESTUESHME
Jetësimi i Shqipërisë së Bashkuar, si proces i pandalshëm dhe si e drejtë historike dhe legjitime e pakontestueshme e kombit shqiptar, nuk përben rrezik, por përkundrazi e shpëton Gadishullin Ilirik nga gjakëderdhjet tjera. Sipas, historianit dhe akademikut të Shkencave Britanike, Prof. Dr. Noel Malcolm: « Bashkimi i Shqiptarëve nuk e kërcënon, as nuk e rrezikon Ballkanin, por përkundrazi e forcon paqën dhe stabilitetin ». Shqipëria e Bashkuar është projekt evropian, në shërbim të paqës, dhe në përputhje të plotë me të gjitha normat dhe parimet e së drejtës ndërkombëtare. Kushtetuta e Republikës së Shqipërisë, e miratuar me referendum popullor (22.11.1998) dhe e pakontestuar nga bashkësia ndërkombëtare, në preambulën e saj e njeh kërkesën e popullit shqiptar si të ligjshme dhe i jep mbështetje juridike: “aspiratën shekullore të popullit shqiptar për identitet dhe bashkim kombëtar” (Preambula, f.5). Gjithashtu, në Nenin 8, pika 1., thuhet: “1. Republika e Shqipërisë mbron të drejtat kombëtare të popullit shqiptar që jeton jashtë kufijve të saj.”(f.7., botoi “Pegi”, Tiranë, 2002). Çdo tendencë e faktorit të mbrëndshëm për ti ikur obligimeve kushtetuese është në kundërshtim të plotë me vullnetin e kombit shqiptar dhe anti-kushtetuese. Teza e politikës zyrtare e dy shteteve shqiptare për kinse bashkim të shqiptarëve në kuadër të Bashkimit Evropian, nuk është gjë tjetër veqse mashtrim i radhës. Shqipëria e Bashkuar forcon Bashkimin Evropian, ashtu siç e ka forcuar bashkimi i gjermanve, dhe kurrsesi integrimi në BE nuk mund të jetë kompensim për mosbashkimin e shqiptarëve. Nese nuk hyjmë në BE si një shtet i bashkuar kombëtar, atëherë hyrja si komb i ndarë në gjashtë pjesë, rrezikon tkurrjen e hapësirës së trojeve shqiptare. Pra, integrimini shqiptarëve të ndarë, kështu siç jemi sot paraqet rrezik për Bashkimin Evropian, ndërsa integrimi i shqiptarëve të bashkuar në një shtet, pra Shqipëri të Bashkuar i kontribon paqës dhe stabilititetit të përhershëm rajonal dhe evropian.
Bashkimi i shqiptarëve në një shtet kombëtar nuk mund të argumentohet si çështje force, por si e drejtë e pamohueshme, sepse është në përputhje të plotë me normat dhe parimet e së drejtës ndërkombëtare. Sipas parimeve të barazisë dhe të vetëvendosjes së popujve, të përcaktuara me Kartën e Kombeve të Bashkuara, e drejta e vetëvendosjes, është përkufizuar në këtë mënyrë: “Të gjithë popujt dhe vendet e kolonizuara gëzojnë të drejtën, që lirisht, pa përzierjen nga jashtë, të përcaktojnë statusin e tyre politik, si dhe zhvillimin ekonomik, kulturor dhe shoqëror, dhe secili shtet e ka për detyrë që të respektojë këtë të drejtë në përputhje me dispozitat e Kartës së Kombeve të Bashkuara.” (W.Ofuatey-Kodoje, Self-Determination in United Nations Legal Order, Cambridge,1995, p.349). Simboli i vetëdijës dhe qëndresës kombëtare shqiptare, Ukshin Hoti në një letër nga gjyqi është shprehur kështu: “Populli shqiptar duhet bashkuar. Këtë e dijnë të gjithë dhe askush më nuk e konteston. Ai duhet të bashkohet për shkak se është i njësuar në planin shpirtëror: e ka një gjuhë, një kulturë dhe një histori.
Për shkak se është një popull i vjetër evropian i Ballkanit, i cili që heret e ka demonstruar pjekurinë e vet shtetformuese; për shkak se gjithashtu që herët e ka arritur nivelin e duhur të vetëdijes politike për veten, për vendin dhe për interesat e veta në regjion, dhe për shkak se e ka dëshmuar në mënyrë të lavdishme dobishmërinë e vet në të gjitha planet e bashkësisë evropiane të popujve. Ai duhet të bashkohet edhe për shkak se e drejta për vetëvendosje është njëra ndër arritjet qenësore të qytetërimit evropian, e drejtë të cilën vetë ajo e ka proklamuar dhe e cila më asnjë populli në Evropë nuk mund t’i refuzohet a t’i mohohet. Popullit shqiptar i duhet një gjë e tillë që të mund të zhvillohet vetë më tej për ta arritur nivelin e përgjithshëm të kësaj bashkësie.” Zgjidhja e drejtë e çështjës koloniale të trojeve shqiptarëve është e lehtë, pra shqiptarëve vetëm duhet t’u kthehet ajo që u është marrë. Shqipëria është i vetmi vend që kufizohet me vetveten, prandaj bashkimi i trojeve shqiptare nuk i hyn në hak askujt, veqse korigjohet një padrejtësi shekullore.
Jetësimi i Shqipërisë së Bashkuar në këtë aspekt do të thotë që kjo pjesë e Evropës të mos jetë më fuqi baroti, siç ka qenë që nga padrejtësia e 1913-ës. Shqipëria e Bashkuar nuk është kundër askujt, por është për të mirën e të gjithve. Aspirata e vendeve të rajonit për integrim në Bashkimin Evropian, na dikton miqësi me fqinjtë, gjithnjë duke respektuar barazinë e plotë dhe të drejtat e gjithsecilit për vetëvendosje, dhe kurrsesi të gjunjëzuar siç e kërkon politika e sotme shqiptare.
nga Tahir VELIU, Nëntor 2015
Autori është ideator i Lëvizjës për Shqipëri të Bashkuar
Na Ndiqni në FACEBOOK
Bëhuni pjesë e Faqes Medvegja REDAKSIA https://www.facebook.com/medvegja.redaksia
