Archives de catégorie : KULTURË

Kënga e rapsodit nuk ndalet_Hetem_H

20/03/2018 tupalla

Hatem Hajrullahu, lindi në fshatin Sfircë K.K të Medvegjës në vitin 1954.
Është një këngëtar i njohur në viset shqiptare, e sidomos në trevat e Gollakut, i cili që nga fëmijëria e filloi këngën. Atëherë kur Hetem Hajrullahu filloi me këngën e tij ,nuk kishte shkollë muzike. Mirëpo, u frymëzua nga këngëtarët e vjetër të asaj kohe, kurse të luaj me çifteli dhe vegla tjera u frymëzua nga rapsodi i njohur Sfircas Zajm Beha ( Baci Zajm) Hetemi bashkë me Qazim Behen filluan këngën së bashku.

Që nga fillimi i këngës se tyre treguan një talent të mirë dhe të suksesshëm. Ishin kohëra të vështira në trevat e Medvegjës. UDB-ja Jugosllave e atëhershme përcillte çdo lëvizje ,çdo këngë të talenteve shqiptarë. Sidomos aty ku në odat tona këndohej kënga shqipe.
Hetemi ishte këngëtar që këndoi kënge : epike,lirike, dashurie ,por në zemër kishte këngën patriotike. Të gjitha këngët e tij të përcjella brez pas brezi, i këndonte me një zë të ëmbël, dhe me një talent të mire këndimi.

Kënga HIT

Duke u frymëzuar nga shumë këngëtarë të trevave shqiptare, e sidomos të atyre drenicase. Idol e kishte këngëtarin e mirënjohur Tahir Drenicën- rapsod i merituar shqiptar. Hetemi edhe pse duke treguar talent ne këndim,bashkohet dhe këndon edhe me idolin e tij Tahir Drenicën, ku zëri i tyre ishte plotësisht identik,duke ju falënderuar Hetemit që e përcolli pa gabime këngën e të madhit Tahir.

Kënga e Hetemit nuk kishte të ndalur në të gjitha trevat shqiptare,por më së shumti ai i këndonte në vendlindje , në mesin e vendasve të tij. Kur censura Sllave ishte në çdo fjalë e në çdo këngë .Hetemi këngën nuk e ndali asnjëherë, nuk frikohej nga UDB-ja, edhe pse shumë herë kishte pësuar probleme nga njerëzit e shtetit.
Sa ishte në Sfircë , këndonte këngë patriotike të Kazasë të Nishit : Trimëreshës “Hasime” trimit “Imer Popovcit” “Muhaxhereve” dhe shumë e shumë trimave të Kombit shqiptar të- të gjithave trojeve shqiptare.
Me kalimin e kohës ,duke ju vështirësuar jeta në fshat, si nga shtypja Serbo-sllave ,si nga kushtet ekonomike u detyrua të shpërngulet në Zvicër. Me shpërnguljen e tij nga vendlindja morri me vete edhe çiftelien edhe këngën.
Kënga e tij nuk u ndal as ne diasporë,kënga filloi e hyri në zemrën e tij edhe më thellë. I shoqëruar me shumë këngëtar të diasporës, Hetemi nuk ndalej me thurjen e vargjeve dhe me këndimin e tyre në një stil me të ri këndimi. Tani nga malli për vendlindjen fillon të këndoi e te kujtoi në tërësi vendin e vet Sfircen e Medvegjen ,si dhe të gjitha fshatra tjera të Jablanicës. Si çdo rapsod që këndon në duet, po-ashtu edhe Hetemi kishte shokun me të cilin këndonte.

Ne Zvicër ishte Tefik Demaj, një vendas Sfircak. Sa i përket Sfircës, historia e ndau në dy pjese, të asaj të Kosovës ,dhe të asaj të Kosovës Lindore.”Serbisë” Por është interesant Hetemin dhe Tefikun nuk mundi ta ndaj askush ,ata ishin së bashku si në këngë ashtu edhe në jetën e përditshme. Këngën me të bukur që e thurën dhe kënduan ishte ajo për Medvegjen,ku shume njerëz me lot ne sy e dëgjojnë këngën e Hetem Hajrullahut. Kënga dhe vargjet e këtij talenti Sfircak nuk ndalej asnjë herë ,nuk ndalet edhe sot. Një këngë për trimat e Medvegjes ju kushtua edhe heroit te UÇK-së Flrorim Rushitit- “Kingji”. Këngë e kënduar me një përkushtim për jetën e këtij heroi dhe për heroizmin e dëshmorit te luftës se Pashtrakut.

Hetem HAJRULLAHU_Tefik DEMAJ

Hetemi me kengën e tij këndoi me shumë shok ,nuk u ndal asnjëherë. Diaspora e kaliti edhe me shumë në këngë. Zëri i tij për trevat shqiptare , e sidomos për Mevegjen nuk ishte vetëm në këngë. Ai tregoi se është një patriot i Kombit. Ndihmonte e kundërshtonte çdo gjë që ishte kundër Kombit Shqiptar. Nuk lejonte askënd të përmbys Kombin. Patriotizmin e kishte trashëgim nga familja e tij e madhe Hajrullahu, ku kjo familje ishte në buzë të kufirit Shqiptaro-shqiptar ,dhe ishte sulmuar e djegur në çdo lufte.

Hetemi që nga vegjëlia u kalit të jetë një atdhetar i devotshëm për Kombin, e këtë me se miri e shpreh në këngën e tij.
Mjerisht, siç çdo shqiptar që koha na shpërndau në të gjitha viset e botës, po ashtu edhe Hetemi pas shumë bredhjeve në Evropë , e sidomos në Zvicër , më në fund kthehet në Kosove, jo në Kosovën Lindore , jo në Sfircën që u lind dhe u frymëzua dhe tërë jetën e ka në zemër. Sfirca tani është bërë një ëndërr e madhe për të gjithë ne sfircakët, kushtet dhe pushteti çdo ditë na bënë të pamundur kthimin në trojet stërgjyshore. Po ashtu edhe rapsodin Sfircak Hetem Harullahun koha dhe shteti i Serbisë e pamundësoi kthimin ne vendlindje.
Hetemi bashkë me këngën që e mban në kokë , Sfircën dhe tërë territoret shqiptare i mban në zemër. Kënga ja kujton ato çdo herë kur ulet dhe merr sharkinë ne dorë. Në këngën e tij edhe unë ndihej dhimbje, kur ai me endje i këndon Medvegjës,Sfircës, Kapitit , Gërbacit ,gurit e lisit të vendlindjes së tij.

Është pak të shkruhet për ketë rapsod Sfircak, sepse edhe sot Baci Hetem nuk ndalet duke kënduar, e duke thur vargje për këngën e tij. Kënga e tij dhe zemra nuk plaket ,tani është edhe me aktiv dhe me i freskët se kur ishte në rinin e tij. Ndoshta tek çdo këngëtar është domethënie që ! ”Vaji i burrit është kënga”: E si duket edhe tek baca Hatem vajin dhe lotin e shpreh në këngë.

Këndofsh gjithë jetën Baca Hetem. Zërin dhe këngën e juaj do ta përcjellim me ëndje, dhe do të frymëzohemi vetëm në rrugën e Kombit, siç ju u frymëzuat nga këngët e idolëve tuaj.
Me Ty mburremi ne Sfircaket dhe tërë Medvegja. Rrofsh sa malet e Sfircës.

Shaban Abazi 19.03.2018 Astana – Kazakistan

Për STAFFIN I REDAKSISË MEDVEGJA Baca Hetem ngelet referenca e Folklorit dhe traditës.

Na ndiqni në Facebook

Bëhuni fans të REDAKSISË Medvegja

AUDIO, KULTURË, LAJME

Milaim MEZINI ka mbi 40 vjet në skenë

17/03/2018 tupalla

Milaim MEZINI është këngëtar dhe autor këngësh i njohur në viset shqiptare i cili i këndon dhe përkushtohet Toplicës e Tetoves, Medvegjes e Malësis,Shkupit e Shkodres, Preshevës e Prevezes,Gucisë e Gostivarit,Tivarit e Tërpezes, Dibrës e Dardanes, Kaçanikut e Kumanoves per artistin kufijt ne mes te shqiptareve nuk kan qen të pranueshem asnjehere në veprimtarin por ishin brengë ate e deshmon edhe karriera e tij shume vjeqare në skenë edhe sot nuk e ndal kontributin e tij duke pasuruar kulturën e folklorin shqiptar.

Nga këngët e fundit të vitit 2018 që po ngrit emocione , kujtime , dhimbje e histori por mbi të gjitha mësime e udhërrëfim për gjeneratat e reja ,most e harrohen rrenjet e Toplices .
STAFFI e Redaksisë Medvegja e ka vequar e vlerësuar bashk me lexuesit këngen Molla e kuqe , këtu në vazhdim keni mundësi ta ndëgjoni :

Për Milaim MEZININ kujtimet jan të freskëta kur rrëfen për rinin e tij si këngëtar në darsmat e Medvegjes duke filluar nga Llapashtica tek familjet MUSLIU,OSMANI, BAJRAMI etj… këndoj si i ri në vendlindjen e Zenel Hajdinit, Idriz AJETIT e shumë ushtarëve, veteranëve që kontribuan aq shumë për të kaluarën e më tepër për të ardhmen ton.Me miqësin që kishte Milaimi atë kohe me Kolegët dhe ato familje tani at miqësi dhe admirim e gëzon nga e gjithë Lugina ku besojm se do të vazhdoj të jetë zëri i Medvegjes , Bujanocit e Presheves sepse sot si asnjë ditë më parë këto troje kan nevoj për mbështetje ngritjen e zërit gjithë andej nga zërat e fuqishëm e atdhetaret siq është Milaimi MEZINI.

Në foto nga e majta Mahmut FERATI e Milaim MEZINI

Ne vazhdim keni Biografin e detajuar te Kantautorit me karrierën e pasur e të nderëshme :
*Lindur në vitin 1959 në fshatin Biçec-Kaçanik, me vendbanim në Ferizaj që nga viti 1999 e deri më sot!
– Ish i punësuar në ,,Sharrcem’’ 36 vj., tani i pensionuar!
– Në artin muzikorë që nga fëmijëria, dhe me traditë familjare!
– Autorë i mbi 400 këngëve, te zhenreve te ndryshme, duke shkruar dhe kompozuar shumë këngë edhe për këngëtaret tjerë!
– Ka zhvilluar aktivitet kulturor në SHKA ,,Rrezet e Sharrit’’ Biçec, 12 vj., SHKA ,,Bajram Curri’’ Prishtinë 3 vj. dhe së fundi në AAKV ,,Kastriotët’’ Ferizaj 7 vj.
– 10 vjet pjesmarrje në RFBK ,,Gllogovci’’ në duet me kolegun Mahmut Ferati.
– Ka kënduar përmedësh deri në 500 këngë.
-Si rapsod, ka kënduar 15 vj.me kolegët: Mahmut Ferati, Shaqir Cërvadiku dhe Baki Bakiu.
– Festivalet: ,,Bemus’’ Beograd-1988, ,,Takimet Abrasheviq’’ Valevë-1986, ,,Kongresi i punëtorëve’’ Sarajevë-1987, ,,Mikrofoni i artë’’ Prishtinë-1988, ,,500 vjetori Arbëreshëve’’ në Kalabri e Sicili të Italisë-1988, ,,Kongresi i Folklorit’’ Prishtinë, organizuar nga Instituti Albanologjik Prishtinë etj.
– Realizoi 140 këngë pas lufte për dëshmorët e kombit!
– 110 këngë për të shkruara për fëmijë, deri më sot, 85 të realizuara.
– 5 herë i shpërblyer me vendin e parë në Fastivale!
– Deri më tani të realizuara 13 albume muzikore, ndër t’a, 3 në duet me Mahmut Feratin, rreth 40 këngë.
– Milaimim ka realizuar mbi 30 Videoklipe profesionale dhe 2 videokaseta nga 180 min. Videklipin e fundit e realizon për “Mollën e kuqe”, kushtuar 140 vjetorit të spastrimit etnik të popullatës Shqiptare nga trojet e tyre etnike.
– Për Institutin Albanologjik në Prishtinë ka 6 orë inçizim në teknikën 4 kanalëshe dhe rreth 1:30 min video-xhirim!
– Xhirime, emisione në të gjitha televizionet tona. Vlen të theksohet xhirimi ne TVSH 1992, pas pluralizmit në Shqipëri, së bashku me Mahmutin, ishin ndër të parët solist që xhiruan emisionin 30 minutësh.
– Performansa të shumta gjithandej trevave tona në manifestime kulturore, si akademi përkujtimore në Kosovë dhe Maqedoni.
Instrumentalist i gjithanshëm, duke luajtur në 7 instrumente muzikore si: Fyell, Prim, Çifteli, Sharki, Fis-harmonikë, Violinë dhe Def!
-Bashkëpunëtorë në librin monografik të autorit Shaban Baksi “Rapsodët e trojeve shqiptare” ku interviston rreth 50 artist!
– Deri më sot ka marrë 40 mirënjohje, falenderime dhe nji dekoratë medalje për kontributin në art.
– Shumë intervista nëpër media, si të shkruara dhe eletronike.
– Kontribues humanitar, duke marrë pjesë në shumë koncerte humanitare anekend trojeve tona, për këtë shpërblehet me mirënjohje dhe medalje nga shoqata “Duart e shpresës” nga Zvicra.
– Në vitin 2004, të gjitha të hyrat materiale të albumit “Zëri i Grykës” dhuron i për shoqatat e dalura nga lufta çlirimtare!
– Të gjithë pasardhësit e tij: Artani, Njomza dhe Andi, janë me ngritje akademike dhe të njohur në fushën e artit muzikorë!

STAFFI I REDAKSISË MEDVEGJA është mirënjohës për modestin dhe bashkëpunimin vllazëror të Milaim MEZINIT

Na ndiqni në Facebook

Bëhuni fans të REDAKSISË Medvegja

Histori, KULTURË, LAJME

7 Marsi-rënia e Heroit Zenel Hajdini

06/03/2018 tupalla

Në Ditën e Mësuesit u vra Heroi i popullit Zenel HAJDINI më 7 Mars 1942

Në ditën kur të gjitha shkollat shqipe festojn ditën e mësuesit për fashatin Tupallë të Medvegjes është ditë dhimbje, kujtimi por edhe krenarie sepse me 7 mars të vitit 1942 u vra heroi i Popullit Zenel HAJDINI një figurë e ditur dhe e ngritur e kohës në këtë treve shqiptare.
Zakonisht nga nxënësit, mësuesit por edhe bashkëfashataret organizojn vizita tek varri i Heroit por varreza në të cilën prehet Trimi i Tupalles është lënë në mëshirë të askujt, pa përkujdesje,ndërsa viteve të fundit edhe është dëmtuar me ndërhyrje nga shteti, duke i hudhur dhjetra metër kub beton.

‘’ Mos vall po kan frikë se do ngrihet nga varri përsëri ’’

Pyetje që duhet të parashtrojm secili nga ne :
– Kush bëri një veprim të tillë !
– A është marr leje nga dikush ?
– A është hudh në konkurs apo paraqit ndonje projekt paraprakisht ?
– A mos pati ndonje reagim apo kerkes zyrtare nga Partit e përfaqësuesit tan në Komunë apo ishin pjesëmarrës të këtij akti ?
– E shumë pyetje të tjera …..

A duhet ne si shoqëri të heshtim në vazhdimësi e ti lejojm që të tallen me më të dashurit tan Heronjtë e Popullit , në vend se të ndërtohet aty pran apo dikund tjetër edhe ndonjë përmendore e Medvegjasëve që kan histori të lavdishëme e të pasur me vepra të shumëta , ku ne ndjehemi krenar kudo që shkojm duke u thirrur në emrin e tyre, siq është Hashim Hajdini ,Florim Rushiti e shumë të tjerë.

7 Marsi – Dita e Mësuesit, që na përkujton ditën kur më 7 mars 1887, u hap në Korçë, nën drejtimin e Pandeli Sotirit, Mësonjëtorja kombëtare shqipe. Ajo ishte shkollë me karakter kombëtar e laik ( jo fetar ) ku të gjitha mësimet jepeshin në gjuhën shqipe. Drejtues të saj ishin figura të njohura të Rilindjes shqiptare, si: Pandeli Sotiri, Petro Nini Luarasi, Nuçi Naçi, Thoma Avrami etj.
Festë Dita e Mësuesit është festë kombëtare nuk është vetëm për punonjës të arsimit shqiptar, por edhe për nxënës e studentë, është një festë që festohet në çdo familje shqiptare. Kjo është një traditë e bukur e krijuar tek populli ynë. Në këtë ditë të rëndësishme të arsimit shqiptar, kujtojmë me respekt të thellë veprën e ndritur të mësuesve dhe patriotëve të shquar, që punuan me përkushtim dhe bënë sakrifica të mëdha, për zhvillimin e arsimit kombëtar.
Duke kujtuar 7 marsin –Ditën e Mësuesit nuk mund të lëmë në heshtje e të mos nderojmë edhe rolin e kontributin e mësuesve të palodhur dhe prindërve të urtë shqiptarë që mbajnë hapur shkollat shqipe në këtë hapësirë shqiptare Preshevë,Bujanoc e Medvegjë.
GËZUAR 7 MARSIN
Një urim shumë të madh për të gjithë mësuesit, ata që i dhanë dhe i japin dritë, frymë dhe shpirt kombit.

Zenel trimi nga trojet tona,
Emri i yt prin në kto shkolla.
Ky Shqiptarë Medvegjali,
Vepra e jote është histori

O Zenel,Zenel bre vëlla,
Kush o trim ty të ka vra.
Kush të vrau heu ju thaftë dora,
Na kan borxh shumë ata hora.

Në vazhdim Biografia e Heroit :
Zenel Hajdini u lind më 191O në fshatin Tupallë te Medvegjes.
Mësimet e para i mori në shkollën e ashtuquajtur « tek Xhamia e Siarinës »
Një kohë punoi si ofiqarë në Medvegjë, Dallohej me një kaliografi (bukurshkrim) të jashtëzakonshëm.
Pas dy vitesh u regjistrua ne Medresën e Shkupit e cila kishte karakter fetar por në të cilen mësoheshin disa gjuhë të huaja dhe ku lëndët empirike zinin një vendë shumë të rëndësishëm. Pas diplomimit në Medresë u regjistrua në fakultetin e shkencave matematiko-natyrore në Beograd.
Gjatë vijimit të vitit të dytë të studimeve në Beograd plasën demostratat e njohura të marsit ku Zeneli mori pjesë aktive. Pas fillimit të luftës Zeneli ishte kthyer në vendëlindje për të vazhduar aktivitetin e vet si anëtar i shtabit për rejonin e Medvegjës.
Eshtë vrarë nga forca bullgaro-çetnike në vijën e parë të frontit në Gazdare më 07 mars 1942.
Po këtë vit në Kosovë u themelua aradha e pare shqiptare e cila për nder të emrit dhe veprës së tij u quajt aradha « Zenel Hajdini ».
Eshtë shpallur hero i popullit me 1953.
Emrin e tij e mbajtën dymbëdhjet shkolla fillore dhe të mesme (në Kosovë në Jabllanicë e ne Maqedoni ),kazerma, rrugë dhe sheshe.

Disa nga këto shkolla dhe rrugë nuk e mbajnë më emrin e tij ngase serbët ua ndërruan pas luftës së Kosovës por ka edhe të tilla që fatkeqësisht ua ndërruan vet shqiptarët.
Veprimtaria:
Zenel Hajdini nuk ishte pajtuar që shqipëtarët të mbesin të pashkolluar dhe kështu të dominohen në aspektin intelektual nga bashlëvendasët e tyre serb.
Rrugën e tij tê shkollimit ua kishte preferuar edhe bashkëfshhatarëve të tjerë siq ishin Idriz Ajeti (akademik i njohur që dha një kontribut të jashtëzakonshëm në lëminë e gjuhës shqipe), Zeqir Bajrami (profesor universiteti dhe një ndër autorët e parë të librit të gjeografisë në gjuhën shqipe)etj, të cilët vijuan mësimet në Medresën e Shkupit disa gjenerata më vonë.
Zenel Hajdnini disa herë kishtë pasur takime me intelektual nga Kosova si Rashid Deda (deshmor) nga Prizreni e të tjerë, nga të cilët kishte kërkuar që ta furnizonin me disa abetare që do ti merrnin në Shqipëri. Kjo ëndërr si edhe shumë të tjera i mbeti e pa realizuar.
Familja:
Zeneli la pas shumë nipêr dhe mbesa të cilët sot jetojnë në Prishtinë e në diaspore (Francë, Gjermani,SHBA,Angli)
Këtu duhet theksuar patjetër emrin e Hashim Hajdinit (djali i vëllaut të Zenelit-Hajvazit) i cili u dallua në luftën e Kosovës duke dëshmuar edhe një herë se rrjedh nga një familje e madhe me traditë atëdhedashurie.
Hashimi luftoi në Fushë Kosovë deri në frymëne tij të fundit kundër hordhive policore dhe paramilitare serbe te cilët e kishin sulmuar në shtëpinë e tij me një makineri të paparë luftarake. Sipas dëshmitarëve këtu kishin gjetur vdekjen mbi dhjetë policë dhe paramilitarë serb, ndërsa perveq Hashimit këtu mbeten të vdekur edhe dy prindërit e tij Hajvazi dhe Gjyla.
Permendorja e Hashim Hajdinit sod eshte e vendosur para kuvendit komunal te Fushe Kosoves .
Zenel Hajdini u varros ne Fshatin e tij te lindjes ne Tupallë ku edhe sod e kesaj dite perkujtohet vepra e tij nga banoret lokale dhe nga nxensit e shkolles fillore qe mban emrin e tij qdo 7 mars.
Dita e shkolles fillore ,,Zenel Hajdini » shenohet me 24 maj per hir te ditlindjes se Zenel Hajdinit

Shtëpija e familjes Hajdini në Tupallë e renovuar nga Familjaret

POEZI

T’U KËNDOJMË HERONJVE

Ata që kanë rënë për lirinë tonë
I madh dhe i vogël le t’i kujtojnë
Ata që e flijuan jetën për liri
Për ne ishin shpëtim-krenari

Më 7 mars ‘42 në kodër të Gazdarit
U vra Zeneli nga dora e barbarit
Ata që e donin, u dhimbsej vërtet
Tinzarët e qanin me lotë përpjet

Ashtu i vrarë tri ditë në borë qendroj
Që ta marrin kufomën armiku s’ lejoj
S’lejonin kriminelët për ta marrë
Se vetë pas shpine atë e kishin vrarë

Ditën e 10 marsit u mblodh farë e fis
Që ta varrosin Zenelin, trimin e lirisë
Oj nëna Zarife, oj nënë kreshnike
Lumja ti e lumja Zenelin që e rrite

Nga prapashpina një jetë ishte sos
Në Tupallën heroike ai u varros
Varri i tij ka një simbolikë-porosi
Që të mos harrohej kurr gjaku i tij

Poezi e shkruar nga Florie NAMANI

Vijon kenga për Heroin e Familjes – Hashim Hajdini i rënë gjat luftimeve në vitin 1999

Tefik Demaj & Hetem Hajrullahu & Florim Demaj - Hashim Hajdini

Na ndiqni në Facebook

Bëhuni fans të REDAKSISË Medvegja

Histori, K. Lindore

Toka e heronjëve të harruar_UÇPMB-së, Fatmir Ibishi

25/02/2018 tupalla

ʹʹToka e heronjëve të harruarʺ

(Në kujtim të dëshmorit të parë të UÇPMB-së, Fatmir Ibishi)

Në rrethana të okupimit, pas luftës së Kosovës, rritja e ndikimit të ideve të çlirimit kombëtar, të
propaganduara nga qarqet atdhetare brenda vendit, si dhe nevoja e vetëmbrojtjes nga terrori
shtetror serb, bënë të domosdoshëm organizimin e lëvizjeve kombëtare shqiptare mbi themelet e
të drejtës për çlirim dhe bashkim me Kosovën. U shtrua kështu si një nevojë e ngutshme formimi
i kësaj celule, sipas shembullit dhe programit të Ushtrisë Çlirimtare të Kosovës, i një organizate
politike-ushtarake, si UÇPMB-ë, të fshehtë në fillimet e para, që do ti bashkonte atdhetarët e
kësaj treve. Kjo vendosmëri sidomos u shtye përpara nga ish veteranët që kishin qenë në luftë të
Kosovës, për të rivazhduar në rrugën e luftës së armatosur edhe në Kosovë Lindore.
Kjo lëvizje ishte me një ide të njejtë kombëtare sikurse ajo e luftës së Kosovës, gjë që e bënë
edhe këtë luftë si vazhdimsi të rrugëtimit dhe përpjekjes për çlirim kombëtarë. Kjo lëvizje kishte
karakteristikat e saja, duke synuar që të përmbushte aspiratat politike të asaj popullate shqiptare
të mbetur jashtë kufijve të Kosovës. Shkalla e nacionalizmit u karakterizua nga ndjenja e
përbashkët, si pjestarë të të njejtit komb, që edhe në fund shekullin XX po vuanin nga robëria
dhe mos çlirimi i tyre. Në jetën shoqërore u zhvillua ideologjia çlirimtare, kombëtare, thelbin e
saj e përbën lufta kundër shtypjes kombtare, me idetë që argumentonin të drejtën e natyrshme
njerzore të kësaj popullate shqiptare për të qenë e lirë dhe e pavarur kombëtarishtë si pjesë e
trungut shqiptarë. Këto ide, të përhapura gjersishtë në rrethet brenda dhe jashtë kësaj popullate u
futën edhe në mendjet e njerzëve të thjeshtë, të cilat ndimuan në formimin te popullata shqiptare
rreth ndërgjegjës së përbashkët kombëtare, e cila e mishëronte vullnetin e tërë asaj popullate,
gjegjësishtë të Preshevës, Bujanocit dhe Medvegjës.
Viktimat civile patën jehonën e dhimbjes në Kosovë Lindore dhe ngjallën indinjatë tek popullata
shqiptare dhe njëkosishtë shkalla e pasigurisë shtohej nga dita në ditë pasi që pushteti serb nga
njëri vendbanim në tjetrin bënte terror mbi popullatën civile.
Fatmir Ibishi nga fshati Uglarë të Gjilanit, kthehet nga perëndimi në vendlindje dhe menjëherë
kyçet në njësitet guerile të UÇK-së, në Zonën Operative të Karadakut në pikën e Zhegocit në
Brigadën 171 “Kadri Zeka”. Në fillimin të luftës së UÇPMB-së Fatmiri ishte ndër të parët, që
nga dalja publike e UÇPMB-së në fshatin Dobrosin. Pas vendosjes në këtë fshat, Fatmir Ibishi
ishte në mesin e tri skuadrave të para që themelohen, Fatmiri ishte Komandant i Skuadrës së
Dytë që ishte themeluar në këtë fshat më 27 janar të vitit 2000.
Gryka Klisura e Konçulit që lidhë Republikën e Kosovës me Serbin është një prej pikave më
strategjike në Kosovën Lindore. Ditë e më shumë ushtrohej dhunë psikike e fizike ndaj
shqiptarëve të Kosovës Lindore në punktin policor në Konçul. Pikrisht Komandant Fatmir Ibishi
më 26 shkurt të vitit 2000, rreth orës 23, me një grup bashkëluftëtarësh prej dy njësitëve të

pjestarëve të UÇPMB-së kishin zënë pritë në kthesën e parë në hyrje të fshatit Konçul, nga
drejtimi Bujanoc-Gjilan, ku sulmuan xhipin e policisë në të cilën ishin katër polic serb, në mesin
e tyre dhe oficer pjesëmarrës në të gjitha luftërat në ish-Jugosllavi. Në përleshje në mes të
ushtarëve të UÇPMB-së dhe policisë dhe paramilitarëve serb, Fatmir Ibishi pati fatin që të jetë
dëshmori i parë i UÇPMB-së. Bashkëluftëtarët nuk mundën fare që ta tërheqin kufomën e tij,
pasi që arritën forca të mëdha serbe. Pas vrasjes së komandantit, policia serbe e marrin kufomën
e komandantit, e dërgojnë dhe varrosin në varrezat Rome në Bujanoc. Falë ndërkombtarëve që i
bën presion palës serbe, pas një muaji nxirret nga varri dhe kufoma e komandantit kthehet në
vendlindje në Kosovë.
Me emrin e tij u themelua Brigada 111 e UÇPMB-së “Fatmir Ibishi”, e cila ishte emëruar për
nderë të dëshmorit dhe heroit të kësaj lufte çlirimtare.

Shkruan: Valon Jashari:
*Historian, ish-veteran i UÇPMB-së,dhe ish-Kryetar i “Lëvizjes së Lirisë”, Lëvizje që
vepron në Preshevë, Bujanoc dhe Medvegjë, si dhe aktivist për të drejtat e
shoqërisë shqiptare.

Na ndiqni në Facebook

Bëhuni fans të REDAKSISË Medvegja

Diaspora, K. Lindore, Kosova, KULTURË, LAJME, Shqiperia E

HISTORIA E SUKSESIT

17/02/2018 tupalla

HISTORIA E SUKSESIT

Medvegja sot renditet ndër vendbanimet shqiptare komuna me numrin më të vogël të shqiptareve dhe me e rrezikuara që të shuhet, që nga viti 1999 ka pas nje rënje të vazhdueshme ku tani arrin në 522 numri i banorëve arsyjet jan të njohura për shkak të konflikteve në Ballkan dhe pozicioni i saj strategjik ,Medvegja ka qene perhere nën presion.
Banorët që u larguan asnjëhere se harruan vendlindjen ku mbajn lidhje të përherëshme ,ata me pune kan vazhduar rrugen e suksesit në fushën e arsimit, ashtu si gjeneratat e me hereshme që krenohemi të gjithë.
Medvegjes për festen e 10 vjetorit të pavarësisë së Kosovës i vjen gëzimi nga Gjermania me lajmin, i shtohet edhe një Inxhinier – Menagjer
Të njhemi me Inxhinier-Menagjerin e parë të vitit 2018 nga Medvegja.
Emri : Arian
Mbiemri : JAKUPI
Vendlindja : Gjermani
Viti i lindjes : 1995
Vendbanimi fillestar i familjes: Medvegjë – Qytet
Shkollimi : Gjermani në isnstitucione arsimore prestizigjioze me renome ndërkombëtare.
Gjatë kohës së studimeve ai ka zhvilluar praktika profesionale në kompani të ndryshme.

Në vitin e fundit të studimeve për 6 muaj me radhë menaxhoi projekte me rendësi te veqant në kompanin e njohur për prodhimin e vetuarave Mercedes në qytetin Stuttgart, ku mori mirënjohje e vlersime të larta për rezultatet e projekteve e tij në sigurin e teknologjis së ardhëshme në këtë gjigant industrial.

Në muajin shkurt të vitit 2018 diplomon pran :
Universitetit Gjerman i themeluar 160 vjet më parë
Furtwangen University / HFU Business School

– Inxhinier Menagjer me temën : Menaxhimi i rrezikut dhe shërbimeve për korporata

Ariani rrjedh nga Familja JAKUPI_lagjja Dediq është nip i familjes SALIHU nga Tupalla, ai viziton vendlindjen rregullisht dhe mban lidhjet të panderprera me njerzit e bashkëmoshatarët e vet gjithë andej.

I riu në Gjermani përveq suksesit në arsim ka dëshmuar rezultate në Sport e mbit ë gjitha në modë me trupin e tij shtatëlart të një Malësori,ka bashkëpunuar me disa shtëpi të modes, thuhet se është i apasionuar me folklorin e mirfillët shqiptar me siguri të trashiguar nga familjarët . Nga instrumentet preferon qiftelin si dhe është një valltar i përkryer.

Çfar e bëne Arianin të veqant ? Ai ku do që gjendet krenohet me kombin e vet dhe punon në promovimin e permisimin e imazhit shqiptar.

Historiku i Familjes JAKUPI :

Familjes JAKUPI e ka prejardhjen nga Medvegja qyteti i sotëm që dikur mbante emrin Dediq dikund deri në vitet 1889, përndjekjet e viteve 1877-1878 të Sanxhakut të Nishit e Toplices edhe Dediqi (Medvegja e sotme ) e pësuan keq si gjithe të tjerët,familjet autoktone u larguan pjeserisht nga qyteti në perifei ku jetojn edhe sot.
Duhet patjeter te thuhet se Lagjja Dediq eshte vend pitoresk dhe nga aty e shef të tërë qytetin si në pëllemb të dores,aty ku kjo lagje i kishte edhe tokat e punueshme buzë lumit Jabllanicë.
Këto toka ishin nën pronësin e tyre deri ne vitet 1985 por shteti gradualisht iu mori nga pronësia me forma te ndryshme p.sh duke ndertaur stacion Policor, e institucione te tjera të siguris shtetërore ,poashtu një pjesë të madhe e shenderroj edhe në zonë indistriale.
Dikur Medvegja ishte Dediqi ndërsa tani është Histori,dhimbje, kujtime e nostalgji për ata që po mundohen edhe sot ta mbajn gjallë.

Kjo është Historia e suksesit per fillimin e vitit 2018, Arianit i urojm suksese në profesion si dhe të gjithe atyre që arrin rezultate të tilla.
Për Medvegjen tradita vazhdon duke synuar majen e piramides në arsim e po ashtu edhe në karrierën profesionale.

Shkruan: F.FERATI,17.02.2018 Germany

Na ndiqni në Facebook

Bëhuni fans të REDAKSISË Medvegja

KULTURË

Sa kohë keni bashkë? Zgjidhni dhuratën e Shën Valentinit që bën për të!

14/02/2018 tupalla

14.Shkurt

Sa kohë keni bashkë? Zgjidhni dhuratën e Shën Valentinit që bën për të!

Gjetja e dhuratës së përsosur nuk është e lehtë dhe mund të jetë shumë stresuese, prandaj ju japim këshilla, të cilat do të duhej t’ju ndihmonin të zgjidhnit më të mirën.

Merr frymë thellë dhe provo t’i thjeshtësosh gjërat . Këto janë disa dhurata të cilat do t’i përshtaten të dashurës suaj, varësisht se sa gjatë jenë në lidhje:

0 – 3 muaj
Dhuroni një libër të preferuar
Keni akoma kohë që të njiheni edhe më mirë, ndërkaq libri do të tregojë që jeni inteligjent dhe mbase botën e shikoni njësoj. Vetëm kujtohu që t’i lësh një përkushtim romantik.

3 – 6 muaj
Bëhuni kreativ me gjëra klasike
Darka romantike dhe një buqetë lulesh akoma janë shprehje e preferuar e dashurisë, mirëpo duket nga pak edhe si klishe. Shiko që pak t’i lëvizësh gjërat dhe të zgjedhësh një restorant me ushqimin të cilin kurrë nuk e keni provuar dhe përfundimisht përpiqu t’u shmangesh luleve.

6 – 12 muaj
Përgatituni për një argëtim interesant
Çiftet të cilët lidhjen e tyre e kanë ndërtuar në themele të ngjashme nuk janë vetëm dashnorë idealë, por edhe miq të shkëlqyeshëm. Mund të planifikosh vizitë në ndonjë bodrum verërash apo të shkoni bashkë në ndonjë ngjarje të cilën të dy e dëshironi.

1 vit
Përpiqu
Kënaqeni me versione luksoze të argëtimit të cilat i përdor. Rroba banje të ngrohta, banjë luksoze apo pizhame komode – do t’i tregosh se sa kënaqesh kur jeni bashkë të shtrirë në shtrat.

Më shumë se 2 vjet
Është koha të lëvizni
Pas disa vjetësh të kaluar bashkë, disa gjëra më nuk janë argëtuese si më parë. Përpiqu që të shkoni bashkë dhe të argëtoheni në ndonjë hobi që e preferoni të dy.

Na Ndiqni në FACEBOOK

Bëhuni fans të Faqes Medvegja REDAKSIA

KULTURË, Poezi

Poezia e vitit 2017

30/12/2017 tupalla Laisser un commentaire

MALLI E DHIMBJA KURRË S’KA ME U SHU

Qaj Medvegja ime
qaj e mos u ndalë,
ah akoma ty e mira ime
po të hapet ai varr!

As për së vdekuri
fëmijët nuk t’i lënë të qetë,
edhe ata pak të gjallë të mbetur
sërish janë duke t’i ndjekë!

Qaj Medvegjë për Mollën e kuqe
qe rrënjët jan duke ju tharë,
se degët e saj gjithandej
nëpër botë janë shpërndarë.

Qaj Medvegja ime
vajin mos e ndalë,
e loti yt u bëftë mallkim
për ata qe dhimbjen tënde s’po e ndiejnë.

E bashkë me ty po qajnë
të gjithë fëmijët e tu,
se malli e dhimbja për ty
kurrë s’ka me u shu!

NGRITE ZANIN NANË SHQIPNI

Th’rret Çamëria me lot n’sy
oh ku je moj nanë Shqipni?
Më shkoj jeta tuj prit nanë
kur po m’merrë në gjirin tënd?

Th’rret Medvegja me Preshevën
kur Kosovë do t’na hapsh derën,
mos na le ti si jetime
se mjaft hëngrëm thik pas shpine!

Merrna merrna nanë Shqipni
hjeki ti kufijt e zi,
merrna nanë për jetë te votra
se ma mirë do t’na njeh bota!

llirida th’rretë Gucin
merri Plavë edhe Ulqin,
hajdi sbashku mori motra
se në sofër na th’rret votra.

Ngrite zanin nanë Shqipni
me i rrafshu të zijt kufi,
ka ardh koha me u bashkue
lot e gjak me i ndalue.

Merrna merrna nanë Shqipni
hjeki ti kufijt e zi,
merrna nanë për jetë te votra
se ma mirë do t’na njeh bota!

PERËNDIA IME E KA VETËM NJË EMËR

Tek ti e kam gjithë dashurinë
për ty e thurri unë poezinë,
tek ti unë e gjejë frymëzimin
tek ti e ndiej gjithë gëzimin.

Për ty flijohem nëse do të duhet
për ty tretem edhe bëhem pluhur,
ty të falemnderoj sa të jemë gjallë
që më dhe emrin të quhem shqipëtarë!

Për ty bie në gjunjë dhe ta puthi tokën
për ty jam në gjendjë edhe ta jap kokën,
ty të falem me mishë e shpirtë
për ty lutem natë e ditë.

Për ty do të jemë gjithë jetën fëmi
je dielli im që gjithmonë bënë dritë,
për mua ti je vetë Perëndia
e shtrenjta ime – Nënë Shqipëria!

Na ndiqni në Facebook

Bëhuni fans të REDAKSISË Medvegja

Histori, Monografi

FIGURË QË NUK HARROHET nga Tupalla

28/12/2017 tupalla

Një figurë e rrall që i Shpetoj TIVARIT por jo edhe torturave të TITOS (Rankoviqit) ishte nga MEDVEGJA

FIGURË QË NUK HARROHET

Në viset dardane të banuara me shqiptar,ka pasur trima pushke,mendimtarë,kryetar dhe njerëz të pendës dhe mendjes së hollë.
Po ashtu në Medvegjen e Kosovës Lindore,kishte dhe ka ende shqiptar që kurrë nuk lëvizen nga idealet e tyre kombëtare.
Në fshatin Tupallë,fshat i njohur në trojet e Medvegjes si njëra ndër fshatrat që dha shumë dijetar , njerëz te arsimit ,dhe trima të pushkës gjatë të gjitha kohërave por edhe sot.
Nga të gjithë është shumë i njohur Hysen (Ramë ) Salihu,apo Baba Sheh.
Ishte lindur në Tupallë në vitin 1914 nga babai Ramë dhe nëna Fatime.
Një familjen e madhe Hasanaj,familje mikpritëse dhe bujare e trevave Medvegjase. Hyseni ishte vëlla i vogël i Alis,Ismajlit dhe Sherif Ramë Salihut i njohur si Baci Shyf , dijetar dhe mezhlistar i asaj kohe. Mirëpo në të kundërtën e vëllait Sherif, Hyseni merret krejt me një lami tjetër të kohës.
Që nga fëmijëria filloi të interesohet me një teknologji të re të asaj kohe. I interesonte çdo gjë që mund të punohet e të perpunohet me një studim të hollësishëm të tij, që puna të dalë e mirë dhe efikase. Që në rini,pa parë kurrë me sy shpifte gjëra të ndryshme të punuara nga druri,punim dore. Për ti lehtësuar vetit punën i punonte me precizitet mjetet e punës; drugdhendësin,dalta te ndryshme,burgia ,çengele dhe të gjitha çka i nevojiten për punë.
Si duket idenë e marrte nga dajallarët e familjes Sahiti në Llapashticë ,ku ishte nip i kësaj familje.
Tërë rininë e kaloi në fshat,me një shkollë dy a po tri vjeçare ,ishte po thuaj i pa shkollë.Por shume i talentuar lexonte dhe shkruante shumë rrjedhshëm.
Kur lufta NÇ e Jugosllavisë të atëhershme, Hysenin e zë diku në frontet e Tivarit dhe ne viset e Shqipërisë .Ne bisedat që ai shpjegonte thoshte: “Kemi luftuar por kurrë se kemi dite për çka po luftojmë “. Me përfundimin e luftës, na thanë tani të gjithë shqiptarët jemi bashkë , dhe me një shtet. Nga Durrësi u kthyem këmbë me një shok për të arrit në fshatin tonë Tupalle,të gëzuar që lufta u krye dhe e fituam shtetin.
Kur arritëm deri në Klinë të Kosovës ,ishim të fshehur me një mal,sepse udhëtonim natën ,ishim të armatosur. Në mëngjes e vrenjtem një shqiptar me plis të bardhë në kokë , i ruante do derra. Në fillim unë mendova që është shërbëtor shkau, me erdhi shumë inati dhe ia ktheva pushkën ta vras. Kur me vërejti shoku im ,më mori pushkën nga supet.! A je tranue a çka je duke bërë “ Ky është shqiptar katolik. Atëherë mu kujtua që thoin ka shqiptar katolik. Unë këtë nuk e dija sepse fshati ku unë kisha lindur e rritë nuk kishte as një serb e lere më katolik.

Me të kthyer në shtëpi , Hyseni prapë merrej me punime druri. Në kohën e luftës kishte pa shumë gjëra interesante, të gjitha ato u mundonte ti punonte vet. Në fillim i punoi rrota kerri (karrocës). Ishte një punim shumë i mirë dhe i suksesshëm për në atë kohë. Çdo ditë zbulonte diçka të re. Furkën për tjerrjen e leshit me sjellje të këmbës, të parën herë në atë kohë. Punonte arka druri me një dekorim të paparaparë dhe shumë tërheqës për syrin.
Për punën e tij shumë precize kuptuan edhe pushtetarët e Komunës ,ku i dhëne urdhër ti punojë vulat e komunës. Edhe ato i punon ku shumë vite shërbejnë këto vula në komunë , e ndoshta edhe sot ekzistojnë diku në arhivë. E punoi biçikletën e parë nga druri, për djalin e tije Ramën,të cilin e donte shumë ,sepse e kishte emëruar në emër të Babës Ramë ,siç thoshte Hyseni.
Hysen Salihu, duke udhëtuar në vende të ndryshme të ish Jugosllavisë dhe me një prirje që kishte nga All-llahu , shkon diku në Kumanovë tek do familjar,atje merr titullin Dervish, hynë ne sektin e tyre.
Me të kthyer në vendlindje,Hyseni fillon të shkruaj dhe të shëroi njerëz që kishin nevojë për shërim. Ishte në atë kohe si një lloj mjeku popullor,por i suksesshëm,ku i besonin populli shumë pa asnjë ngatërresë nga askush për shërimin e tij. Edhe në këtë lami mori një autoritet me emrin Baba Sheh .
Nga të gjitha këto talente që kishte një kishte me së shumti që i flinte në shpirt patriotizmin , dhe fitoren e popullit shqiptar që ja kishin premtuar pas luftës e kurrë nuk e gëzoi.
Në fshat ku jetonte i kishte afër komshi shkiet e Dërvodelit, fshatë që dikur ishte me shqiptar e që Serbia i shpërnguli nga trojet e tyre dhe vendosi shkije. Gjithnjë thonjte kur bisedonte me djalin e axhës Rexhep Salihun,të cilin e donte dhe i besonte shumë.
“O Rexhep! shkau me pas në dorë pushtet na pret brenda natës” ,edhe ky komshiu i jonë Jefta është njeri nga ta. Jefta ishte një komshi i Dërvodelit i cili i kishte uzurpuar tokat e shqiptare e tregonte veten që është shumë i mirë për shqiptar,por në zemër ishte çetnik i përbetuar.
Për idealet e tij që kishte në zemër,një ditë vere të viti 1974 në një lokal ditë hynë i mllefosur dhe në murin e lokalit ku ishte fotoja e Josp Broz Titos i drejtohet me këto fjalë : “ Shoku Tito ti je i dyti,që të pret thika në fyt ,
Rankoviqi ka qenë i pari që ka pi gjak shqiptari”

Për këto fjalë Hysenin e fusin ne burg plot 6 muaj në Leskovcë dhe Nish.
Thoshte: “Më liruan diku në orën 2 të natës”në Medvegjë u futa prapë në të njëjtin lokal me mendim ti shtijë flakën,kishte qenë mbyllë vazhdova në fshat ku mezi pritja të filloi punët që kisha lënë gjysmë.
Në të gjitha festat zgjidhjet lokale e parlamentare dhe e tëra çka organizonte ish Jugosllavia nuk kam mare pjesë. Ishte shtet i poshtër i rrenave dhe i hajduteve. Thoshte daja Hysen. Në pleqëri i erdhi kohe shumë e hidhur. Me të shpërngulur të familjes se tij në Kosovë pikërisht ne Matiqanin e Prishtinës ,detyrohet të shpërngulet edhe ai. Me një bisedë gjithnjë e përsërite thoshte:
“ Kur ja kam hekur kulmin e shtëpisë në Tupallë, mu ka dukë që e kam hekë kapakun e kokës sime “
E kam ditë që me kurrë nuk do te kthehem.

Me të shpërngulur në Matiqan, krijon një rreth të mirë ,ku të gjithë e donin dhe respektonin,ku edhe sot e kësaj dite familja e tij e mbetur kanë respekt të veçantë ne emër te Babës Hysen.
Vdes në Matiqan me 1994 pa e shijuar “Lirinë”që sot gëzon Kosova dhe pa u kthyer në vendlindjen e Tupallës.

Shkruan: Shaban Abazi- Kazakistan
Për hir të respektit të dajës Hysen të ndjerë .Kërkoj ndjesë nga farefisi që nuk e kam ceku para emrit të- të ndjerit Daja Hysen, në shenjë respekti .E kam dashur shumë dhe respektuar sepse e kisha Dajë të mirë.

Na ndiqni në Facebook

Bëhuni fans të REDAKSISË Medvegja

Histori, K. Lindore, LAJME, Shqiperia E

PUSHTIMI SERB i vitit 1867

23/12/2017 tupalla

Lugina e Preshevës, përpara se të pushtohej nga Mbretria e Serbisë, ishte territor i pushtuar si gjithë territori i Gadishullit Ilirik( Ballkanik), nga Perandoria Osmane. Me lindjen e shteteve ballkanike, në këtë rast edhe me lindjen e shtetit të Serbisë, i’u kanos rreziku Trojeve Shqiptare. Njejtë ndodhi edhe me Luginën e Preshevës.
Mbretria e Serbisë, nga pasvitet 1867, filloi të rrezikonte trojet Shqiptare të Sanxhakut të Nishit, e më gjerë.

Mbretria serbe, lidhi marrëveshje me Mbretrinë Greke, më 26 korrik 1867, i njohur si Traktati i Vëslaut, kundër Perandorisë Osmane të luftonin, derisa Trojet tona mbaheshin të okupuara nga kjo perandori. Kjo marrëveshje parashihte edhe cënimin e integritetit të Trojeve Shqiptare, ku Serbia kërkonte të merrte të ashtuquajturën “Serbi e vjetër” ( ku e përfshinin edhe tërë territorin e Luginës së Preshevës, por edhe Kosovën dhe Iliridën-Maqedoninë). Në shkurt 1868, nënshkruan edhe Konventën Ushtarake.
Mbretria Serbe, më 13 dhjetor 1877 dhe 5 shkurt 1878, të mbështetura nga Rusia, si udhëheqëse Pansllavike, e që nga 3 marsi 1878 i’u bashku edhe Mali i zi, derisa Rusia në Transkaukaz si dhe në Ballkan luftonte kundër Perandorisë Osmane, njihet si fillimi i Rrezikut për Preshevën, Bujanovcin dhe Medvegjën. Forcat serbe, morën territoret Shqipëtare të Sanxhakut të Nishit, e deri në Vranjë.
Edhe pse Austro-Hungaria me Rusinë kishte bë një marrëveshje të fshehtë, për ndarjen e zonave të influencës në Ballkan, më 8 korrik 1876, ( Marrëveshja e Reichstadt). Këtu trajtohej për herë të parë çështja Shiqptare, Rusia tërësisht mohonte qenësinë Shqiptare, derisa Austro-Hungaria plotësisht kundërshtonte këtë. Kjo marrëveshje është plotësu edhe me Marrëveshjen sekrete të Budapeshtit, e që po ashtu ishte plotësu më pas edhe me një marrëveshje tjetër
shtesë të 18 mars 1877, ku theksohej që Austro-Hungaria do duhej të qëndronte neutrale në luftën Ruso-Turke, kurse shpërblim do mund ta merrte Bosnjën dhe Hercegovinën, ndërsa Sanxhaku i Novi Pazarit do të rregullohej me një marrëveshje të veçantë. Në këtë rast Austro-Hungaria, garantonte që s’do cënonte Serbinë, Rumaninë, Bullgarinë dhe Malin e Zi, të cilat Rusia i kishte si satelitë të saj. Si kusht shihej që nëse do prishej plotësisht Perandoria Osmane, do bëheshin të pavarura Bullgaria, Rumania dhe Shqipëria. Kjo luftë mbaroi me gjunjëzimin e Perandorisë Otomane, e që u nënshkru Traktati i Shën Stefanit më 3 mars 1878, ku nga Rusia u kriju Bullgaria e Madhe.
Traktati i Shën Stefanit, i jepte Serbisë edhe territore Shqiptare si Sanxhakun e Nishit, e deri në Vushtrri- Mitrovicë, ku përfshihej edhe Medvegja, sipas nenit 3.
Derisa Bullgaria sipas këtij Traktati, do merrte Preshevën dhe Bujanovcin, siç thuhet në nenin 6 të këtij traktati.

Fuqitë e mëdha Europiane, ishin të pezmatuara nga ky zgjerim influence e Rusisë në Ballkan, nga kjo thirrën Kongresin e Berlinit që do dal edhe Traktati i Berlinit.
Konferenca Ndërkombëtare e Londrës, e marsit 1877, fare nuk e shqyrtoi çështjen Shqipëtare si komb i veçantë! Por që vetëm e rregullonte Bullgarinë, e cila përfshinte edhe territoret Shqipëtare(Kaçanikun, Tetovën, Gostivarit, Kërçovës, Dibrës deri në Drin).
Bashkimi i Shqiptarve, në qëllimin për arritjen e objektivave politike, doli në shesh vetëm pas formimit të Komitetit të Janinës, maj 1877. Ku e udhëhoqi Abdyl Frashëri, biseduan me Greqinë, që të krijonin aleancë- në krijimin e shtetit të përbashkët Shqiptaro-grek, e cila nuk u arritë shkaku i qëllimeve ekspansioniste greke. Nga ky rast lindi Objektivi Kombtar Shqiptar për Çlirim të Kombit Shqipëtar- e që jo pak u kundërshtu dhe luftu( veçmas nga turkofilët)!
Më 18 dhjetor 1877, në Stamboll, u kriju Komiteti i Stambollit( Komiteti Qendror për Mbrojtjen e të Drejtave të Kombësisë Shqiptare), ku kërkesa kryesore ishte një shtet Shqipëtarë nën vasalitetin e Sulltanit. Shtetet kombtare të Ballkanit, tashmë ishin formu, si Greqia, Serbia, Mali i Zi etj ( këto dy të fundit do u njihej ndërkombtarisht Pavarsia me Kongresin e Berlinit).
Derisa më 13 qershor 1878, në Berlin do mbahej Kongresi i Berlinit, 3 ditë përpara në Prizren u formu Lidhja e Prizrenit, në të cilin u miratu dy akte vendimtare: Kanuni- Kararnameja (Akti i Vendimeve) dhe Talimati( Urdhëresa), më 17 qershor 1878.
Neni 1 i Kaunit, theksonte se qëllimi i Lidhjes së Prizrenit ishte mbrojtja e tërësisë tokësore të Perandorisë Osmane. Në nenin 2 thuhej që Lidhja e Prizrenit do e luftonte çdokë që do përpiqej ta dobësonte autoritetin e qeverisë osmane! Mirëpo në nenin 6, theksohej që Lidhja e Prizrenit kundërshtonte vetëm lëshimin e tokave Shqiptare. Nga 13 qershor deri më 13 korrik 1878, u zhvillu Kongresi i Berlinit, ku merrnin pjesë Fuqitë e Mëdha: Britania e Madhe, Rusia, Franca, Austro-Hungaria, Italia, Gjermania dhe Perandoria Osmane, dhe 4 shtetet ballkanike Greqia, Serbia, Romania dhe Mali i zi, derisa Shqipëtarët nuk përfaqësoheshim, edhe pse dërguan me dhjetra peticione. As Bullgaria nuk përfaqësohej edhe pse Rusia kërkonte që të merrte pjesë! Kongresi i Berlinit nuk mori parasysh aspak të drejtat e popujve, por trajtoi-pajtoi vetëm interesat e Fuqive të Mëdha, ku Gjermania e mbështeste Austro-Hungarinë, Britania, Austro-Hungaria tentonin ta minimizonin influencën ruse në Ballkan, ndërsa Franca dëshironte vetëm izolimin e Gjermanisë, kurse Italia dëshironte zvogëlimin e influencës së Austro-Hungarisë në Ballkan.

Traktati i Berlinit në aspektin juridik, mbetet bazamenti i vetëm mbi të cilën Serbia okuptoi dhe deri më sot administron kolonin, pra Medvegjën dhe pjesët etnike Shqiptare të Sanxhakut të Nishit e deri në Vranjë. Sipas këtij Traktati, në nenin 1, Bullgaria mbetej nën vazalitetin e Sulltanit, por me qeveritarë të krishtere dhe milici kombëtare. Nenin 2, definonte territori i Bullgarisë, i cili u zvogëlu, krahasuar me territorin që kishte nga Shën Stefani-e që nuk e përfshinte Luginën e Preshevës dhe as territore të tjera Shqipëtare! Neni 26, i njihte Pavarësinë Malit të zi.Neni 35 rregullonte të drejtat fetare dhe politike nën Serbi, ndërsa në nenin 36 kufizohej territori i shtetit serbë, i cili ishte zgjeru disafish, që përfshinte brenda saj edhe malet e Kopaonikut, lumin Ibër dhe Sitnica deri edhe Medvegjën. Derisa Bujanovci dhe Presheva ende mbetën nën okupimin Osman, e që kufiri me Serbi ishte matan Bujanovcit tek Mali Shën Ilia! Ndërsa në nenin 39, trajtohej çështja e pronësisë së muslimanve në territoret e okupuara nga Serbia, e që në asnjë rast nuk trajtohej aspak çështja, territori, prona, kërkesat politike etj të Shqiptarve!
Sanxhaku i Nishit, Vranjës, Leskocit, etj i ishin dhënë Bullgarisë, derisa në Kongresin e Berlinit, këto i’u falën Mbretrisë së Serbisë.
Nga ky çast i Historisë, rrodhi tragjedia për komunën e Medvegjës, e cila deri më sot mbetet e robëruar nga Serbia, e që bashkëvuajtëse me të ishin edhe Sanxhaku i Nishit, Piroti, Leskoci, Kurshumlia, Prokulpa, Jabllanica, Vranja, Vllasina, etj, prej të cilave u zhdukën Shqiptarët!
Me këto akte gjenocidi, krime lufte, spastrimi etnik, masakrat, njihen si institucione juridike, që do lindin më pas, e që e tërë bota do i përdorë në komunikime dhe çështje juridike.

nga Leon Tupalla

Na ndiqni në Facebook

Bëhuni fans të REDAKSISË Medvegja

K. Lindore, KULTURË, LAJME, Shqiperia E

Në ndihme të arsimit të Medvegjes,Bujanocit e Presheves

14/12/2017 tupalla

NJË DHURATË E BUKUR PËR MËSUESIT DHE NXËNËSIT E SHKOLLAVE TË MESME NË PRESHEVË, BUJANOC DHE MEDVEGJË.

Këto ditë doli në qarkullim botimi psikopedagogjik i radhës:
« MBI EDUKIMIN QYTETAR – ADOLESHENCA ».

Një libër metodik, psikopedagogjik, i konceptuar me 4 kapituj, 12 nënkapituj, me 8 tabela dhe 9 diagrama (gjithësejt 256 faqe), me përfundime dhe i shoqëruar me një fjalor të fjaleve kyçe.
Një botim studimor, në natyrë metodike në ndihmë të punëtorëve të arsimit, në fushën e Pedagogjisë Modernen shqiptare. Mësuesit do të gjejnë në faqet e librit parimet filozofike që përshkojnë pedagogjinë modern, përpjekjet që duhen bërë në sistemin arsimor për ti dhënë arsimit shqip një model kombëtar, duke respektuar standardet bashkëkohore dhe përvojat më të mira të shkollës perëndimore. Nxënësit e shkollave të mesme, pse jo dhe studentët, do të gjejnë veten në faqet e librit, duke përvehtësuar idetë, dukuritë, trajtesat, të dhënat statistikore, shëmbujt konkret nga jeta arsimore e shkollore, sidhe raportet e marrëdhënieve me familjen dhe komunitetin.
Boshti i studimit synon të sjellë disa risi të reja të veprimtarisë brenda dhe jashtë shkollës, tendencat e integrimit të nxënësve në komunitet dhe roli i spikatur i familjes dhe kujdesit prindëror për ti mbajtur fëmijët larg rreziqeve që dëmtojnë jetën e tyre.
Në bashkëautorësi me Doktoreshën e Shkencave Sociale, Denis Çelçima, ky botim hap rrugën për studime më të thelluara në fushën e edukimit qytetar të adoleshentëve, duke dhënë një kontribut modest në shëndetin moral të rinisë, në edukimin e tyre në interest ë ardhmërisë kombëtare.

Me respekt e mirënjohje, si bashkëautorë, këmi shprehur dëshirën dhe vullnetin e mirë që 150 kopje të këtij botimi të shkojnë dhuratë për bibliotekat, mësuesit dhe nxënësit në gjimnazin e Preshëvës, Bujanocit dhe Medvegjës.
Kjo dhuratë, na bën optimist, që në të ardhmen, këtyre bibliotekave t’u shtohen në inventarin e tyre botime të tjera, në interes të forcimit të cilësisë programore në edumkimin akademik dhe qytetar të të rinjve tanë. Falënderojmë të gjithë mësuesit, këta njerëz të mrekullueshëm, të cilët me përkushtim në përmbushjen e misionit të tyre fisnik, sot japin kontributin e çmuar në interes të forcimit të arsimit shqip dhe gjuhës tonë të bukur Shqipe.
Shkruan :
Dr. Sulejman Abazi – NESHAJ, Dr. Denis Çelçima. Tiranë, më 14. 12. 2017

Na ndiqni në Facebook

Bëhuni fans të REDAKSISË Medvegja

www.tupalla.com

Archives de catégorie : KULTURË

Kënga e rapsodit nuk ndalet_Hetem_H

Milaim MEZINI ka mbi 40 vjet në skenë

7 Marsi-rënia e Heroit Zenel Hajdini

Toka e heronjëve të harruar_UÇPMB-së, Fatmir Ibishi

HISTORIA E SUKSESIT

Sa kohë keni bashkë? Zgjidhni dhuratën e Shën Valentinit që bën për të!

14.Shkurt

Sa kohë keni bashkë? Zgjidhni dhuratën e Shën Valentinit që bën për të!

Gjetja e dhuratës së përsosur nuk është e lehtë dhe mund të jetë shumë stresuese, prandaj ju japim këshilla, të cilat do të duhej t’ju ndihmonin të zgjidhnit më të mirën.

Poezia e vitit 2017

FIGURË QË NUK HARROHET nga Tupalla

PUSHTIMI SERB i vitit 1867

Në ndihme të arsimit të Medvegjes,Bujanocit e Presheves

Presheva,Bujanoci,Medvegja